Дүрс оношилгооны тасаг нь хүний биеийн дотоод бүтэц, үйл ажиллагааг дүрслэлээр харуулж, өвчнийг оношлох, эмчилгээний шийдвэр гаргахад чухал мэдээлэл өгдөг анагаах ухааны үндсэн оношилгооны салбар юм. Нүдэнд үл харагдах дотоод эрхтнийг аюулгүй, өндөр нарийвчлалтайгаар ажигласнаар өвчнийг эрт илрүүлэх, үнэн зөв оношлох боломжийг бүрдүүлдэг.
Энд толгой-хүзүү, цээж, хэвлий, нуруу, мөчдийн ердийн рентген зураг, гурван хэмжээст өндөр нягтралтай КТ, соронзон орныг ашигласан MRI шинжилгээг гүйцэтгэдэг. Мөн элэг, цөсний хүүдий, бөөр, бамбай булчирхай, хөх зэрэг зөөлөн эдийн эмгэгийг бодит цаг хугацаанд илрүүлэх хэт авиан шинжилгээ, бичил кальцификат болон жижиг голомтыг илрүүлэх дижитал хөхний зураг авалтыг хийдэг.
Интервенцийн хувьд элэгний хавдрын үед судас бөглөх химийн эмболизаци (TACE), судасаар шууд цацрагт бодис тарьж хавдрын эсийг устгах цацрагийн эмболизаци (TARE/SIRT), хэт хүйтнээр хавдрыг устгах криоабляци зэрэг дэвшилтэт аргуудыг идэвхтэй хэрэгжүүлж байна. Мөн AI технологийг нэвтрүүлснээр дүрслэлийн чанарыг сайжруулж, шинжилгээний хугацааг богиносгон, оношийн нарийвчлалыг нэмэгдүүлж байна.